Gal 5 | DOB | STEP | Miya bobo'ana manuna Keliso 'ili'amida 'ada yonao 'ediyega, 'enega wada toolopa'ala be geya'abo watagwatagwala limanemi Mosese 'ina loina yoniyonina 'enaya.

Galatians 5

1 Miya bobo'ana manuna Keliso 'ili'amida 'ada yonao 'ediyega, 'enega wada toolopa'ala be geya'abo watagwatagwala limanemi Mosese 'ina loina yoniyonina 'enaya.

Keliso 'ina loina bobo'ana

2 'Abo'agu Paulo yaloguguya 'emiya be 'abo Mosese 'ina loinao 'ediya watagwalemi, nai 'abo me Yudia 'idi we'iwe'iyaya lodaba* bwalamiya sida guinuwe, Keliso 'ina lema 'emiya waloseye. 3 Manuna 'eguma yaita 'emiyega 'itagwale be bwalana silodabai, 'ilobwene be Mosese 'ina loinao maibo'adi wate 'ida ematamatanedi, 4 be 'abo yaita 'oyo nuwanuwayo be Mosese 'ina loinao 'adi ematamatana 'enega 'awabobo'ana 'uda loba, ni'atu Keliso 'ina oboboma 'emuya 'uloseyena, ga tauna 'upilisinena.

5 Manuna 'abo'ada Yaubada taemisena be 'aene 'i'awa palupaluyeda. Gete 'ida nuwayaina Yaluyaluwa Tabuna 'enega, ga manuna tayamwayamwa.

6 Ona'ai'aila, Yesu Keliso 'enaya me Yudia 'adi we'iwe'iyaya, nate bwaladi silodaba, nigeya 'igiepaepaluyeda, be wate 'abo lodaba taguitoyase geya'abo 'ada 'awapalupalu talobaloba. Nate namo 'eguma Yesu taemise be taobobome, tauna 'ada togiepalu.

7 'Omi lowa wapili waiwai emisa 'ina 'eda 'ai'aila 'enega, 'enega yaita 'isa'u bodemi? 8 'Etoboda gete nigeya Yaubada 'enega, manuna lowa Yaubada 'ibwauyemi tauna 'ina 'eda 'enaya, ta esi 'etoboda gete mali tomota 'ediyega. 9 Getei 'atuwa 'ebweu yage gidalina, ta esi to'umalina, ta sawesawenaya be 'igie to'umali sinabwana.

10 'Abo'agu 'Inapwana yaemisena be 'igienuwa sabwalenimi, be 'igu loina namo wada muliye, ta 'abo yaita tauna 'ami togieloniu, 'ana e'isa Yaubada 'enega ma'etamo 'iloba.

11 Gosegwao, geya'abo wanuwena 'abo'agu yaloguloguguya be 'aene tomota sida lodabadi be me Yudia 'idi loina sida muliyedi, ta 'igu loguguya esi Keliso 'ina mwawasa kelose 'enaya manuna, ta loguguya gete manuna me Yudia sinuwamwau ga sietalauwalegu. 12 Ona'ai'aila, 'ilobwenena be taudi 'ami togieloniu nidi taudimo silo'ewa yauledi be 'ewa'ewadi.

13 Gosegwao, Yaubada ni'atu 'iesinuwemi ga li'ali'amimi, ta geya'abo wanuwena 'aene nigeya 'ami loinamo be bubuna bale'u wamulimuliyedi, ta esi oboboma 'ina loinega wada tauya be taumimo wada elemalema limanemi.

14 Manuna loina maibo'adi 'adi bwagila, loina 'ebweuna gete, 'igwae,

“Gosemwao 'uda obobomedi nadigega tauyo 'amu oboboma.”

15 'Eguma loina gete wapilisine be taumimo 'emiya waetalauwala, ma'etamo 'ami boda waloesawali. ^{▼▼ *daba nai lodaba: Nugana 17:10-14 'ena Yaubada Ebelaamo 'iloinena be 'aene tauna be natunao me'olotodi be tubunao me'olotodi 'idi yage bwaladi sida 'upwa yauledi, nate we'iwe'iyaya nai 'ebe 'inana sida guinuwe, ta 'ana mwalatoi taudi Yaubada 'ina tomotaiyao esiesinuwadi.}

Yaluyaluwa uwana dumadumana ta bwala uwana dumadumana

16 'Enega 'ilobwenemi be Yaluyaluwa Tabuna 'ianuganemi ta 'enega geya'abo yalakwaiyao siloiloinemi. 17 Manuna yalakwaiyao Yaluyaluwa Tabuna sietalauwalena, ta sa'i Yaluyaluwa Tabuna 'ida yalakwaiyao 'ietalauwaledi. 'Enega soladaya silosalosaiya, ta to'ase bobo'ana nuwanuwada be taguinuwei nigeya sawesawedaya be taguinuwei. 18 Nate namo 'eguma Yaluyaluwa Tabuna 'ianuganemi, Mosese 'ina loinao sigugumwala 'emiyega.

19 Ooda 'ina guinuwao tamwalamwalatonidi, nate loelata, loyawe, gagasa, 20 nabwasuwa, balau, egewagewana, etalauwala, e'ipi'ipi, gamwasowala, debaose, weyala, sinala, e'idi'idi, 21 be wate 'ebe gwausowala to'umalina bwasi waiwai 'ana numa 'enega, ta 'aina wate bubuna to'umalidi. Bubuna getedi manudi lowa yaemataluwemi, ta batuwa yaemataluwa limami 'aene 'adi toguinuwao geya'abo Yaubada 'ina 'ebeloina 'ena silugulugu.

22 Ta sa'i Yaluyaluwa Tabuna uwana bobo'adi 'atedaya getedi, oboboma, gwausowala, miyasiwalowa, toolopa'ala, lema, bubuna palupaluna, emisa, 23 bubuna nuwana, 'alama'i'ita. Ta nigeya 'ebweu wate loina 'imiyami be yage getedi 'ida 'etobodedi. 24 Ta wate 'eguma Yesu Keliso 'iloineda, ooda 'ina bubuna to'umalidi be yalakwaiyao 'iloemwawasidi 'ana kelose 'enaya. 25 Ta yawasida bobo'ana 'i'ebwa'eda Yaluyaluwa Tabuna 'enega, ta 'ilobwenena be Yaluyaluwa nina 'ianuganeda.

26 Ta geya'abo tanuwanuwa tu'e, nai gosedao tae'oata'oatadi, nai tae'ipi'ipiyedi.v17 Lo 7:15-23v18 Lo 6:14v22-23 Md 7:16-20; Ep 5:8-9v24 Kol 3:5v26 Pi 2:3